Հայաստանի արտաքին գործերի նախարարի այցը Վրաստան

14 հունիսի, 2010

Էդվարդ Նալբանդյանը հանդիպում է ունեցել իր վրաց գործընկերոջ` Գրիգոլ Վաշաձեի հետ: Հանդիպմանը երկուստեք արձանագրվեց, որ նախարարների պարբերակական հանդիպումները հնարավորություն են ընձեռում հետեւողականորեն իրականացնել պետությունների ղեկավարների միջեւ ձեռք բերված պայմանավորվածությունները, ինչպես նաեւ մշակել համագործակցության նոր ծրագրեր:

Հայ-վրացական մշակութային համագործակցության քննարկման ենթատեքստում նախարար Նալբանդյանը գոհունակություն է հայտնել մշակութային ոլորտում արձանագրված փոխանակումների ակտիվացման կապակցությամբ` հատկապես Հայաստանում անցկացված Վրաստանի մշակույթի օրերի, եւ Վրաստանում Հայաստանի մշակույթի օրերի հաջողության առումով: Ձեռք է բերվել պայմանավորվածություն` այդ դրական փորձառության շարունակությունը ապահովող քայլեր ձեռնարկելու վերաբերյալ:

Հայաստանի եւ Վրաստանի արտգործնախարարները մանրամասն քննարկել են վիրահայությանը հուզող մի շարք խնդիրներ: Այս ենթատեքստում Գրիգոլ Վաշաձեն ներկայացրել է դրանց լուծմանն ուղղված Վրաստանի իշխանությունների կողմից իրականացվող ծրագրերը` մասնավորապես աշխատատեղերի ստեղծման, ճանապարհների կառուցման եւ կրթական ու մշակութային հաստատությունների պայմանների բարելավման բնագավառներում:

Ձեռք են բերվել պայմանավորվածություններ` հայ-վրացական համագործակցության ամրապնդման վերաբերյալ:

Նույն օրվա երկրորդ կեսին Վրաստանի նախագահի կողմից տրամադրված ուղղաթիռով Հայաստանի արտգործնախարարը մեկնել էր Բաթում, ուր Էդվարդ Նալբանդյանին ընդունել է նախագահ Միխեիլ Սաակաշվիլին:

Էդվարդ Նալբանդյանը Վրաստանի ղեկավարին փոխանցել է Հայաստանի Նախագահ Սերժ Սարգսյանի ողջույնները:

Միխեիլ Սաակաշվիլին գոհունակություն է հայտնել Հայաստանի եւ Վրաստանի միջեւ հաստատված բարիդրացիական հարաբերությունների առնչությամբ` նշելով, որ Հայաստանի Նախագահի հետ հաստատված երկխոսությունը հնարավորություն է տալիս արդյունավետորեն առաջ մղել երկկողմ փոխգործակցությունը:

Նախագահ Սաակաշվիլու եւ նախարար Նալբանդյանի զրույցի ընթացքում այլ հարցերի թվում արծարծվել են նաեւ վիրահայությանը մտահոգող մի շարք խնդիրներ, դրանց լուծման ուղիները:

Ընդունելության ավարտին Վրաստանի նախագահը խնդրել է իր բարեմաղթանքները փոխանցել Հայաստանի ղեկավարին:

Հարկ է նաև նշել, որ Բաթումի մեկնելուց առաջ, հունիսի 14-ի առավոտյան, Էդվարդ Նալբանդյանը հանդիպել էր Վրաստանի հայ համայնքի հետ և խոսել հայ-վրացական հարաբերությունների ներկայի եւ հեռանկարների մասին, տեղեկություններ հաղորդել իր հանդիպումների մասին: Այդ հանդիպման ժամանակ, վիրահայության ներկայացուցիչների խնդրանքով, ՀՀ արտաքին քաղաքական գերատեսչության ղեկավարը ներկայացրել է Հայաստանի արտաքին քաղաքականության առաջնահերթությունները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր