Ապրիլի 24-ը` Թբիլիսիում:

24 ապրիլի, 2011

Հայոց Ցեղասպանության 96-րդ տարելիցին Թբիլիսիի Սուրբ Գևորգ մայր եկեղեցում Վիրահայոց թեմի առաջնորդ Տ.Վազգեն եպիսկոպոս Միրզախանյանը մատուցեց Ս.Հարության պատարագ, որին ներկա էր Վրաստանում Հայաստանի Հանրապետության արտակարգ և լիազոր դեսպան Հովհաննես Մանուկյանը: Պատարագից հետո կայացավ երթ դեպի Թբիլիսիի Հայ գրողների և հասարակական գործիչների Խոջևանքի պանթեոն` վիրահայ համայնքի ներկայացուցիչների և դեսպանության աշխատակիցների մասնակցությամբ` ի հիշատակ Մեծ Եղեռնի անմեղ զոհերի:

Պանթեոնում Վրաստանում ՀՀ դեսպանության անունից ծաղկեպսակ դրվեց հայ նահատակների հիշատակը հավերժացնող խաչքարին: Այնուհետև մատուցվեց սգո պատարագ: Պատարագին հաջորդած հանրահավաքում ելույթ ունեցավ Հայաստանի Հանրապետության դեսպանը, որն իր խոսքում, մասնավորապես, նշեց. «Ցեղասպանությունը մարդկության դեմ ուղղված ամենածանր հանցագործություն է: XX դարի առաջին ցեղասպանության ճանաչումն ու դատապարտումը մենք դիտարկում ենք ոչ միայն որպես տուրք անմեղ զոհերի հիշատակին, այլև հետագա ցեղասպանությունները կանխարգելելու միջոց: Ցեղասպանության ճանաչումը ռևերանս չէ Հայաստանի, ոչ էլ` թշնամական քայլ Թուրքիայի նկատմամբ: Դա արդարության և արդարադատության պատասխանն է ոճրագործներին, ցանկացած երկրի պարտավորությունը»:

Հայոց Ցեղասպանության տարելիցին նվիրված միջոցառումներն ավարտվեցին Թբիլիսիում Թուրքիայի Հանրապետության դեսպանության մոտ Վրաստանի հայ երիտասարդական կազմակերպությունների և Վիրահայ համայնքի ներկայացուցիչների հանրահավաքով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր