Թբիլիսիում նշեցին Մեծ հայրենական պատերազմում հաղթանակի և Շուշիի ազատագրման օրը

09 մայիսի, 2011

Մայիսի 9-ին, Թբիլիսիում Ա.Խորավայի անվան Դերասանի տանը Հայ Առաքելական Սուրբ Եկեղեցու Վիրահայոց թեմի «Հայարտուն» մշակութային կենտրոնը կազմակերպել էր տոնական երեկո` Մեծ հայրենական պատերազմի 66-րդ և Շուշիի ազատագրման 19-րդ տարելիցների կապակցությամբ:

Երեկոյին ցուցադրվեցին կադրեր Մեծ հայրենական պատերազմի մասին պատմող վավերագրական կինոնկարներից, որտեղ նկարահանված էին պատերազմին մասնակցած հայ զինվորները, ինչպես նաև «Շուշիի առասպելը» վավերագրական կինոնկարը: Հյուրերի առջև հանդես եկան երգիչներ Նինա Կարապետյանը, Անահիտ Հարությունյանը, Հենրիխ Պողոսյանը և «Ջեյրան» ու «Անի» պարային համույթները:

Համերգից հետո Մեծ հայրենական և Ղարաբաղյան պատերազմի վետերաններին հանձնվեցին դրամային պարգևներ և նվերներ:

Երեկոյի ավարտին վետերաններին տոնական օրվա կապակցությամբ շնորհավորեցին Վրաստանում Հայաստանի Հանրապետության արտակարգ և լիազոր դեսպան Հովհաննես Մանուկյանը և Վիրահայոց թեմի առաջնորդ Տ.Վազգեն եպիսկոպոս Միրզախանյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր