Տոնական համերգ և ընդունելություն՝ նվիրված Հայաստանի Հանրապետության և Վրաստանի միջև դիվանագիտական հարաբերությունների հաստատման 30-ամյակին

16 նոյեմբերի, 2022

Նոյեմբերի 16-ին Թբիլիսիի Վասո Աբաշիձեի անվան պետական նոր թատրոնում Վրաստանում ՀՀ դեսպանության կողմից կազմակերպվեց միջոցառում՝ նվիրված Հայաստանի Հանրապետության և Վրաստանի միջև դիվանագիտական հարաբերությունների հաստատման 30-ամյակին։ Միջոցառումն անցկացվում էր ՀՀ Ազգային ժողովի նախագահ Ալեն Սիմոնյանի և Վրաստանի խորհրդարանի նախագահ Շալվա Պապուաշվիլիի բարձր հովանու ներքո և մասնակցությամբ։

Տոնական միջոցառմանը մասնակցում էին երկու երկրների խորհրդարանների պատգամավորներ, Վրաստանի կառավարության ներկայացուցիչներ, Վրաստանում հավատարմագրված դեսպաններ և դիվանագիտական կորպուսի ու միջազգային կազմակերպությունների ներկայացուցիչներ, Վիրահայոց թեմի առաջնորդը և հայ ու վրաց եկեղեցիների ներկայացուցիչներ, բարձրաստիճան այլ հյուրեր, Վրաստանում բնակվող հայ և վրաց հասարակական-մշակութային գործիչներ, այլ հյուրեր։

Իր ողջույնի խոսքում Վրաստանում ՀՀ դեսպան Աշոտ Սմբատյանն անդրադարձավ հայ և վրաց ժողովուրդների՝ հազարամյակների անսասան բարեկամությանն ու փոխառնչություններին, ինչպես նաև պատմական ամուր կապերի վրա Հայաստանի և Վրաստանի միջև ձևավորված արդյունավետ միջպետական համագործակցությանն ու վերջին տարիներին երկկողմ հարաբերություններում նկատվող աննախադեպ դինամիկային։ Ընդգծվեց քաղաքակրթական ընդհանուր արժեհամակարգով, խաղաղ ու ժողովրդավար ապրելու ձգտումով և ստեղծագործելու տաղանդով օժտված մեր երկու ժողովուրդների միասնականության կարևորությունը՝ տարածաշրջանում տևական խաղաղության և կայունության հաստատման համար։ ՀՀ դեսպանը շնորհակալություն հայտնեց Տավուշի թեմի մանկապատանեկան երգչախմբին՝ միջոցառմանը ելույթով հանդես գալու դեսպանության հրավերն ընդունելու համար։

Ելույթներով հանդես եկան նաև Վրաստանի խորհրդարանի նախագահ Շալվա Պապուաշվիլին և ՀՀ ԱԺ նախագահ Ալեն Սիմոնյանը։ Երկու երկրների խորհրդարանների նախագահներն անդրադարձան հայ և վրաց ժողովուրդների պատմական ու մշակութային հարուստ կապերին, բարձր գնահատեցին երկու պետությունների միջև դիվանագիտական հարաբերությունների 30-ամյա պատմության ընթացքում երկկողմ հարաբերություններում արձանագրված հաջողություններն ու ձեռքբերումները։

Միջոցառմանը հյուրերի ուշադրությանը ներկայացվեց հայ-վրացական հարաբերությունների 30-ամյա պատմության ընթացքում երկու երկրների բարձրաստիճան պաշտոնյաների այցերի և հանդիպումների արխիվային լուսանկարների կարճ ֆոտոշարք, որից հետո իրենց բարձր կատարողական արվեստով հանդես եկան Տավուշի թեմի մանկապատանեկան երգչախմբի երեխաները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր