«Տերյանական օր» ավանդական տոնակատարություն

12 հուլիսի, 2025

Հուլիսի 12-ին հայ մեծանուն քնարերգու Վահան Տերյանի ծննդավայրում, Վրաստանի Նինոծմինդայի մունիցիպալտետի Գանձա գյուղում տեղի ունեցավ «Տերյանական օր» ավանդական տոնակատարությունը։ Բանաստեղծի 140-ամյա հոբելյանը այս տարի նշանավորվեց նրա վերականգնված տուն-թանգարանի բացման հանդիսավոր արարողությամբ, որին ներկա էին ՀՀ ԿԳՄՍ և Վրաստանի մշակույթի նախարարներ՝ Ժաննա Անդրեասյանը և Թինաթին Ռուխաձեն, Վրաստանում ՀՀ և ՀՀ-ում Վրաստանի դեսպաններ՝ Աշոտ Սմբատյանը և Գիորգի Շարվաշիձեն, Սամցխե-Ջավախեթիի նահանգապետ Զաալ Գելաշվիլին, հյուրեր ՀՀ-ից և Վրաստանի տարբեր շրջաններից։

Հյուրերը շրջայց կատարեցին արդի չափանիշներին համապատասխան հիմնանորոգված թանգարանի սրահներով, թոնրատնով, բակով, տեղում այլևս գործող տեխնոլոգիաների շնորհիվ՝ ականատեսը դարձան գրողի կյանքի իրական դրվագների և ուրվագծված պատկերի, ծանոթացան նրա գրական ու հասարակական գործունեությանը։

Իր ողջույնի խոսքում Ա․Սմբատյանը շնորհակալությոն հայտնեց Վրաստանի իշխանություններին հայկական մշակույթի հանդեպ հոգածության համար և մեջբերեց Տերյանի հայտնի խոսքերը՝ երբ ուզում ես կյանքդ լինի ժամացույցի նման, ապա այն պետք է լարես ժամացույցի նման։ ՀՀ դեսպանն իր խոսքն ամփոփեց թանգարանի վերանորոգմանը աջակցություն ցուցաբերած բարերարներին ուղղված գնահատանքով և շնորհակալությամբ։

Տերյանական օրը հագեցած էր նաև հարուստ համերգային ծրագրով, որը կազմակերպել էին Ջավախքին աջակցության հիմնադրամը և Նինոծմինդայի քաղաքապետարանը՝ Վրաստանում ՀՀ դեսպանության և ՀՀ ԿԳՄՍՆ աջակցությամբ։ Հանդես եկան ՀՀ ազգային նվագարանների պետական նվագախումբը, ՀՀ պետական կամերային երգչախումբը, ինչպես նաև ՀՀ և տեղի անհատ կատարողներ ու ասմունքողներ։

1957թ․-ից գործող Վահան Տերյանի տուն-թանգարանի վերջին շրջանի նորոգման և ժամանակակից տեխնոլոգիաներով համալրման աշխատանքները իրականացրել է Ջավախքին աջակցություն հիմնադրամը՝ Նինոծմինդայի մունիցիպալիտետի աջակցությամբ։ Թանգարանի պատմությանն ու գործառույթներին հնարավոր է ծանոթանալ նաև https://vahanteryan.com/ կայք-էջում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր