ՀՀ դեսպանն այցելեց վրաց գծանկարչուհի Նինո Փիրցխալաիշվիլուն

19 հունվարի, 2012

Ս.թ. հունվարի 19-ին Վրաստանում ՀՀ արտակարգ և լիազոր դեսպան Հովհաննես Մանուկյանն այցելեց վրաց գծանկարչուհի Նինո Փիրցխալաիշվիլուն: Ներկայումս վերջինս բուժման ինտենսիվ կուրս է անցնում Վրաստանի ազգային ուռուցքաբանական կենտրոնում:

Հանդիպման ընթացքում մտքեր փոխանակվեցին Ն.Փիրցխալաիշվիլու աշխատանքների հրատարակման, այս տարի Հայոց Մեծ եղեռնի հիշատակի միջոցառումների շարքում կրկին համապատասխան խորագրով ցուցադրում կազմակերպելու, ինչպես նաև հետագա համագործակցության վերաբերյալ այլ հարցերի շուրջ:

ՀՀ դեսպանի հետ զրույցում Նինո Փիրցխալաիշվիլին ցանկություն հայտնեց` Հայոց Ցեղասպանության թեմատիկայով արված ավելի քան 100 գծանակարներ միջոցառման ավարտից հետո նվիրել հայ ժողովրդին:

Տեղեկանք

Նինո Փիրցխալաիշվիլին հայտնի անհատ է թբիլիսյան հասարակության շրջանակներում, և մասնավորապես, վայելում է հայ համայնքի սերն ու հարգանքը: Նկարչուհու գծանկարների զգալի մասը նվիրված է Ֆ.Վերֆելի «Մուսա լեռան 40 օրը» վեպի թեմաների պատկերազարդմանը (ընդհանուր թվով` 150 գծանկար):

2011թ. ապրիլի 24-ին Թբիլիսիի «Շերատոն Մետեխի Փալաս» հյուրանոցի ցուցասրահներից մեկում տեղի էր ունեցել նրա` վերոհիշյալ թեմայով գծանկարների հերթական ցուցահանդեսը:

2011 թվականին, Կոմիտասի 90-ամյակին նվիրված միջոցառումների շարքում, Թբիլիսիում, «Կովկասյան տուն» հասարակական կազմակերպության գրասենյակի դահլիճում կազմակերպվել էր հայ մեծ կոմպոզիտորին նվիրված գծանկարների ցուցահանդես, որոնք ևս այս նկարչուհու ստեղծագործություններն են:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր