Դեսպան Մանուկյանի այցը Սամցխե-Ջավախքի տարածաշրջան

13 հուլիսի, 2012

Ս.թ. հուլիսի 13-ին Վրաստանում Հայաստանի Հանրապետության արտակարգ և լիազոր դեսպան Հովհաննես Մանուկյանը հերթական այցելությունն իրականացրեց Վրաստանի հայաբնակ Սամցխե-Ջավախքի տարածաշրջան:

Այցելության ընթացքում կայացավ Հայաստանի դեսպանի և Սամցխե-Ջավախքի տարածաշրջանում Վրաստանի նախագահի նորանշանակ լիազոր (նահանգապետ) Իվանե Ծիկլաուրիի հանդիպումը: Հանդիպման ընթացքում քննարկվեցին հայ-վրացական հարաբերությունների օրակարգին առնչվող մի շարք հարցեր տնտեսական, սոցիալական և մշակութային բնագավառներում: Դեսպանն ու նահանգապետը մտքեր փոխանակեցին տարածաշրջանային տնտեսական ծրագրի, ենթակառուցվածքների շարունակական մոդեռնիզացման, սոցիալական ծրագրերի, ինչպես նաև էթնիկ հայ բնակչության ազգային ինքնության պահպանությանն ուղված համատեղ քայլերի անհրաժեշտության մասին: Ձեռք բերվեց պայմանավորվածություն երկուստեք հետաքրքրություն ներկայացնող հարցերի շուրջ սերտ համագործակցության վերաբերյալ:

Նույն օրը դեսպան Մանուկյանը մասնակցեց Ախալքալաքիի շրջանում, աշուղ Ջիվանու հայրենի Կարձախ գյուղում վերանորոգված Սուրբ Կարապետ եկեղեցու դռնբացեքի հանդիսավոր արարողությանը: Հատկանշական է, որ մոտ 100 տարի չգործած այս եկեղեցին վերանորոգվել է կարձախցիների համատեղ ջանքերով, այդ թվում գյուղի այն բնակիչների, ովքեր արդեն վաղուց հեռացել են իրենց հայրենի Կարձախից և այժմ բնակվում են Հայաստանի տարբեր վայրերում: Արարողությունը կատարվեց Հայ Առաքելական Եկեղեցու Վիրահայոց թեմի առաջնորդ Վազգեն եպիսկոպոս Միրզախանյանի գլխավորությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր