Վրաստանի հայազգի նկարիչների կատալոգի շնորհանդես Վրաստանի մշակույթի և հուշարձանների պահպանության նախարարությունում

29 հունվարի, 2013

Հունվարի 28-ին Վրաստանի մշակույթի և հուշարձանների պահպանության նախարարության դահլիճում տեղի ունեցավ Վրաստանում ՀՀ դեսպանության կողմից հրատարակված “Վրաստանի հայ նկարիչները Հակոբ Հովնաթանյանից մինչև Գայանե Խաչատրյան. դրվագներ մեծ պատմությունից” նկարազարդ կատալոգի շնորհանդեսը: Հրատարակությունը նվիրված էր 19-20-րդ դարերում Վրաստանում, մասնավորապես Թբիլիսիում ապրած և ստեղծագործած հայկական ծագում ունեցող անվանի նկարիչների բազմաժանր աշխատանքներին, որոնք այսօր պահվում են Վրաստանի տարբեր թանգարաններում և անհատ կոլեկցիոներների հավաքածուներում:

Շնորհանդեսի բացման խոսքով հանդես եկավ Վրաստանի մշակույթի և հուշարձանների պահպանության առաջին փոխնախարար Մարինա Միզանդարին, որը բարձր գնահատելով թիֆլիսահայ նկարիչների անգնահատելի ավանդը Վրաստանի մշակութային կյանքում` կարևորեց նման նախաձեռնությունների արդյունավետությունը մշակութային համագործակցության տեսանկյունից:

Միջոցառմանն առանձին ելույթով հանդես եկավ Վրաստանում ՀՀ արտակարգ և լիազոր դեսպան Հովհաննես Մանուկյանը, որը մասնավորապես նշեց. <<Թիֆլիսյան դրոշմը կա մեր գրականության և թատրոնի, գեղարվեստական ողջ մտածողության վրա, սակայն, այս ամենի հետ մեկտեղ եզակի երևույթ է տարբեր ժամանակաշրջաններում Թբիլիսիում լայն գործունեություն ծավալած հայ անվանի նկարիչների ստեղծագործությունը` ֆենոմեն հռչակված հայ գեղանկարչության թբիլիսյան դպրոցը>>: Ըստ դեսպան Մանուկյանի. <<Հակոբ Հովնաթանյանից մինչև Գայանե Խաչատրյան. դրվագներ մեծ պատմությունից>> անդրանիկ ցուցահանդեսը փորձ է թե’ մեր երկրների, թե’ ամբողջ աշխարհի արվեստի սիրահարներին ներկայացնել Վրաստանի հայ կերպարվեստի վարպետներին` ստեղծագործական ուրույն ձեռագրով, տարբեր գեղարվեստական որակներով, էքսպրեսիվ արտահայտչականությամբ և ներգործության ուժով>>:

Հանդիսությանը ներկա էին Հայ Առաքելական Եկեղեցու Վիրահայոց թեմի առաջնորդ Վազգեն եպս. Միրզախանյանը, Վրաստանի մշակույթի և հուշարձանների պահպանության նախարարության բարձրաստիճան պաշտոնյաներ, Թբիլիսիում գործող հայկական հասարակական կազմակերպությունների ներկայացուցիչներ և Վրաստանում ՀՀ դեսպանության անձնակազմը:

Շնորհանդեսը լայնորեն լուսաբանվեց տեղական լրատվամիջոցներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր