Սիրիահայերին հումանիտար աջակցության նպատակով կազմակերպված հերթական բարեգործական համերգը Թբիլիսիում

11 փետրվարի, 2013

Փետրվարի 9-ին, Թբիլիսիի «Art Hall” համերգային դահլիճում, Հայ Առաքելական Ուղղափառ Եկեղեցու Վիրահայոց Թեմի «Հայարտուն» մշակույթի կենտրոնի նախաձեռնությամբ և Թբիլիսիում գործող հայկական կազմակերպությունների աջակցությամբ կայացավ բարեգործական համերգ` նվիրված Վարդանանց տոնին: Շարունակելով սիրիահայերի օգնության միջոցառումների շարքը, բարեգործական համերգի կազմակերպիչները նախաձեռնել էին նաև Վրաստանի հայ նկարիչների գործերի ցուցահանդես-վաճառք: Բարեգործության ողջ հասույթը փոխանցվելու է Սիրիայի հայ համայնքին: Միջոցառմանը իր մասնակցությունը բերեց նաև Վրաստանում ՀՀ դեսպանությունը` արտակարգ և լիազոր դեսպան Հովհաննես Մանուկյանի գլխավորությամբ:

Միջոցառմանը իրար հաջորդեցին ճանաչված մենակատարների և տարբեր մրցույթների մասնակիցների ու դափնեկիրների կատարումները: Պատվավոր հյուրի կարգավիճակով ելույթ ունեցավ Երևանից ժամանած <<ԱՎԱ>> տրիոն` Արտո Թունջբոյաջյանի մասնակցությամբ:

Համերգի բացմանը Վրաստանում ՀՀ դեսպանության խորհրդական Տիգրան Թումանյանն ընթերցեց Վրաստանում ՀՀ արտակարգ և լիազոր դեսպան պարոն Հովաննես Մանուկյանի` միջոցառման մասնակիցներին ուղղված ուղերձը.

<<Սիրելի´ հայրենակիցներ,

Այս միջոցառումը կրում է մեծ հայրենասիրական լիցք: Մասնակցելով այսօր Վարդանանց ազգային և հոգևոր տոնին նվիրված միջոցառմանը, Դուք ո´չ միայն հաղորդակից եք դառնում ազգապահպան գաղափարներին, այլև կարևոր ներդրում կատարում ծանր կացության մեջ հայտնված մեր հայրենակիցների աջակցության գործում:

Շնորհակալ եմ դրա համար:

Ցանկանում եմ նաև քաջալերանքի խոսքով դիմել սիրիահայերին և հույս հայտնել, որ նրանք կհաղթահարեն վերջին ժամանակաշրջանում իրենց վիճակված դժվարությունները, հոգեպես անկոտրում կմնան` անցնելով Սիրիայում ծավալվող ողբերգությունների բովով և մոտ ապագայում կվերադառնան խաղաղ և արարիչ կյանքին` գրանցելով նոր նվաճումներ ու հաղթանակներ>>:

Միջոցառման վերջում օրհնության և գնահատանքի իր խոսքում Վիրահայոց թեմի առաջնորդ Տեր Վազգեն եպիսկոպոս Միրզախանյանը կարևորեց Վարդանանց տոնի խորհուրդը, ինչպես նաև երախտիքի խոսք ուղղեց կարևորագույն հումանիտար այս ակցիայի բոլոր մասնակիցներին և աջակիցներին:

Սիրիահայերի օգնությանն ուղղված բարեգործական ակցիաները Վրաստանի հայ համայնքում շարունակվում են:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր