Հայ Կաթողիկե Եկեղեցու Հայաստանի, Վրաստանի, ու Արևելյան Եվրոպայի թեմերի առաջնորդ Գերաշնորհ Տեր Ռաֆայել արքեպիսկոպոս Մինասյանի այցը Վրաստանում Հայաստանի դեսպանին

28 փետրվարի, 2013

Փետրվարի 27-ին, Վրաստանում իր հովվական այցի շրջանակներում, քաղաքավարական այցով Վրաստանում Հայաստանի Հանրապետության դեսպան Հովհաննես Մանուկյանին այցելեց Հայ Կաթողիկե Եկեղեցու Հայաստանի, Վրաստանի ու Արևելյան Եվրոպայի թեմերի առաջնորդ Տեր Ռաֆայել արքեպիսկոպոս Մինասյանը: Ողջունելով Գերաշնորհ արքեպիսկոպոսին` դեսպան Մանուկյանն անդրադարձավ հայ եկեղեցու դերի կարևորությանը Սփյուռքում հայկական ինքնության պահպանության գործում:

Հանդիպման ընթացքում, ներկայացնելով տարածաշրջանում Հայ Կաթողիկե Եկեղեցու հետևորդներին, Տեր Ռաֆայելը արքեպիսկոպոս Մինասյանը, մասնավորապես նշեց, որ Ջավախքի տարածաշրջանում առկա է մոտ 60 հազար հայ կաթողիկե համայնք` շրջկենտրոն քաղաքներում և 20-ից ավելի գյուղերում: Զրուցակիցներն անդրադարձան Վրաստանի հայ համայնքում առկա կրթական, հոգևոր և մշակութային հիմնախնդիրներին առնչվող բազմաբնույթ հարցերի, այդ թվում` հայկական դպրոցներում հայոց լեզու և գրականության դասաժամերի քանակի և այլ առարկաների` հայերենով դասավանդման խնդիրներին:

Դեսպան Մանուկյանը և Ռաֆայել Արքեպիսկոպոս Մինասյանը քննարկեցին նաև ջավախքի հայությանը հուզող մի շարք սոցիալ-տնտեսական հիմնախնդիրներ: Զրույցի ընթացքում անդրադարձ եղավ նաև հավատքի, խղճի ազատության լիարժեք դրսևորման իրավական և փաստական հնարավորություններին` որպես ոչ միայն հոգևոր ինքնադրսևորման արտահայտչաձև, այլ նաև որպես մարդու հիմնարար իրավունքների պաշտպանության ապահովման առումով պետության պարտավորություն:

Հանդիպման ավարտին ՀՀ արտակարգ և լիազոր դեսպան Հովհաննես Մանուկյանը շնորհակալություն հայտնեց Հայ Կաթողիկե Եկեղեցու Հայաստանի, Վրաստանի ու Արևելյան Եվրոպայի թեմերի առաջնորդին այցելության համար, մասնավորապես, կարևորելով պետության և եկեղեցու համագործակցության արդյունավետությունը հայության հոգևոր և մշակութային կյանքի զարգացման գործում:

ՏԵՂԵԿԱՆՔ

Հայ Կաթողիկե Եկեղեցին պատկանում է Արևելյան Կաթողիկե Եկեղեցիների շարքին և ենթարկվում է Հռոմի Պապի առաջնությանը։ Հայ կաթողիկե եկեղեցու հիմնադրման գաղափարը առաջացել է 12-րդ դարի վերջում Կիլիկյան Հայաստանի տարածքով դեպի Սուրբ Հող ճամփորդող խաչակիրների և տեղի հոգևորականության միջև հարաբերությունների հաստատումից։ Ներկայիս Կաթողիկոս Ներսես Պետրոս ԺԹ. Հայ Կաթողիկե Եկեղեցու Հայրապետն է:

Տանն Կիլիկիո Հայ կաթողիկե պատրիարքությունը ներկայումս առաջնորդություններ (թեմեր, վիճակներ, էքզարքություն, փոխանորդություն, համայնքներ) ունի Եվրոպայում, Հյուսիսային և Հարավային Ամերիկայում, Մերձավոր Արևելքում, Ավստրալիայում, Հայաստանում և Վրաստանում:

Հայաստանի, Վրաստանի և Արևելյան Եվրոպայի թեմը (առաջնորդարանը` Գյումրիում) կազմավորվել է 1991-ին` Հռոմի պապի վճռով: Ընդգրկում է նաև Ռուսաստանը և Ուկրաինան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր