Դեսպան Հովհաննես Մանուկյանի այցելությունը Աջարիայի Ինքնավար Հանրապետություն

16 մայիսի, 2013

Մայիսի 14-ին և 15-ին Վրաստանում ՀՀ արտակարգ և լիազոր դեսպան Հովհաննես Մանուկյանն աշխատանքային այցով եղավ Աջարիայի Ինքնավար Հանրապետության մայրաքաղաք Բաթումիում:

Այցելության առաջին օրը Բաթումիում գտնվող ՀՀ գլխավոր հյուպատոսության շենքում կայացավ դեսպան Մանուկյանի հանդիպումը համայնքային կազմակերպությունների ղեկավարների հետ: Հանդիպմանը մասնակցում էին Բաթումիում ՀՀ գլխավոր հյուպատոս Արամ Գրիգորյանը և Բաթումիի Սբ. Խաչ եկեղեցու հոգևոր հովիվ Տեր Արարատ Գումբալյանը:

Հանդիպման ընթացքում քննարկվեցին հայ համայնքային կառույցների գործունեությանը վերաբերող խնդիրներ, աջարահայության սոցիալ-տնտեսական վիճակին և հոգևոր-մշակութային կյանքին առնչվող հարցեր: Ներկաներն իրենց առաջարկներն ու տեսլականը ներկայացրեցին համայնքային կյանքի աշխուժացման և համայնքային բոլոր կառույցների գործունեության արդյունավետության բարձրացման ուղղությամբ իրականացվելիք անհրաժեշտ քայլերի վերաբերյալ: Հատուկ առանձնացվեց եկեղեցու կարևոր դերը համայնքի հոգևոր-մշակութային կյանքում:

Մայիսի 15-ին կայացավ դեսպան Մանուկյանի հանդիպումը Աջարիայի ինքնավար հանրապետության կառավարության ղեկավար Արչիլ Խաբաձեի հետ: Հանդիպմանը դեսպանին ուղեկցում էր Բաթումիում ՀՀ գլխավոր հյուպատոս Արամ Գրիգորյանը:

Դեսպան Մանուկյանն իր առաջին քաղաքավարական այցի սկզբում շնորհավորեց Աջարիայի կառավարության ղեկավարին նման պատասխանատու պաշտոնում ընտրվելու կապակցությամբ և համագործակցության խորացման հույս հայտնեց ինքնավար հանրապետության ղեկավարության հետ:

Զրուցակիցները քննարկեցին փոխադարձ հետաքրքրություն ներկայացնող բազմաթիվ հարցեր, այդ թվում` զբոսաշրջային ոլորտում համագործակցության, Աջարիայի տնտեսությունում, մասնավորապես, գյուղատնտեսության ոլորտում հայկական ներդրումների հնարավորության, Աջարիայի ԻՀ և Հայաստանի Լոռվա մարզի, ինչպես նաև փոխադարձաբար չորս քույր քաղաքների համագործակցության աշխուժացմանն առնչվող հարցեր, հայ համայնքի առանձին խնդիրների լուծմանը Աջարիայի կառավարության կողմից աջակցություն տրամադրելու հնարավորության խնդիրը:

Դեսպան Մանուկյանը և Աջարիայի ԻՀ կառավարության ղեկավար Արչիլ Խաբաձեն պատրաստակամություն հայտնեցին շարունակել հետագա համագործակցությունը քննարկված խնդիրներին արդյունավետ լուծումներ գտնելու և բազմաոլորտ շփումներն առավել խորացնելու ուղղությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր