Ռոբերտ Ամիրխանյանի ստեղծագործական երեկոն Թբիլիսիում

10 սեպտեմբերի, 2013

Սեպտեմբերի 7-ին, Թբիլիսիի Ազգային գրադարանի ցուցահանդեսային դահլիճում Վրաստանում ՀՀ դեսպանությունը ՀՀ Մշակույթի նախարարության հետ համատեղ կազմակերպել էր ՀՀ ժողովրդական արտիստ, Սուրբ Մեսրոպ Մաշտոց շքանշանակիր, ՀՀ պետական մրցանակի դափնեկիր, Հայաստանի կոմպոզիտորների և երաժշտագետների միության նախագահ, պրոֆեսոր Ռոբերտ Ամիրխանյանի ստեղծագործական երեկոն:

ՀՀ Մշակույթի նախարարության նախաձեռնությամբ և ՀԱԵ Վիրահայոց թեմի աջակցությամբ` Թբիլիսահայ համայնքի և Հայաստանի միջև մշակութային կապերը ամրապնդելու նպատակով կազմակերծված միջոցառումը բացեց ինքը` Ճանաչված կոմպոզիտոր Ռոբերտ Ամիրխանյանը` կատարելով Հայաստանին նվիրված «Երազ, իմ երկիր» երգը:

Ստեղծագործական երեկոյին ներկա էին Վրաստանում ՀՀ արտակարգ և լիազոր դեսպան Հովհաննես Մանուկյանը, ՀԱԵ Վիրահայոց թեմի առաջնորդ Գերաշնորհ Տ. Վազգեն եպս. Միրզախանյանը, հոգևոր դասի, թբիլիսահայ համայնքի ներկայացուցիչներ, Ռոբերտ Ամիրխանյանի արվեստի երկրպագուներ:

Դեսպան Մանուկյանը, բարձր գնահատեց մաեստրո Ամիրխանյանի ժառանգությունը երաժշտության մեջ և երգարվեստում: <<Աշխարհասփյուռ հայկական համայնքներում հայապահպանության, ազգային ինքնության պահպանության երկու կարևորագույն գործոն կա ` լեզուն և մշակույթը: Վրաստանի համայնքը` որպես ավանդական, առավել մեծաքանակ և ազդեցիկ համայնքներից մեկը, այսօր մշակութային վերելք է ապրում, և մեր պարտականությունն է անել առավելագույնը` նպաստելու համար այս գործընթացին և ամրապնդելու համար համայնքի բազմաշերտ մշակութային կապերը մեր հայրենիքի հետ>>,- իր խոսքում նշեց ՀՀ դեսպանը:

Միջոցառման ընթացքում օրհնության և գնահատանքի խոսքեր ուղղելով ներկաներին, ՀԱԵ Վիրահայոց թեմի առաջնորդ Գերաշնորհ Տ. Վազգեն եպս. Միրզախանյանը, իր խոսքում անդրադարձավ վիրահայության և հատկապես թբիլիսահայության համայնքային կյանքի ակտիվացման խնդրին, համայնքի կրթական և մշակութային հիմնախնդիրների հետևողական լուծելու կարևորությանը:

Երեկոյի ընթացքում Ռոբերտ Ամիրխանյանի ստեղծագործությունների հրաշալի կատարմամբ հանդես եկավ Հայաստանի կատարողական արվեստի նորահայտ, բայց արդեն իսկ մեծ ճանաչում ձեռք բերած երգչուհի Սեդա Ամիր-Կարայանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր