Լոռվա մարզի պատվիրակության այցը Աջարիայի Ինքնավար Հանրապետություն

12 սեպտեմբերի, 2013

Սեպտեմբերի 8-10-ը աշխատանքային այցով Բաթումում էր գտնվում ՀՀ Լոռվա մարզի պատվիրակությունը` մարզպետ Արթուր Նալբանդյանի գլխավորությամբ: Պատվիրակության կազմում էին նաև Լոռու մարզի այն քաղաքապետերը, որոնց գլխավորած քաղաքները քույր քաղաքներ են Աջարիայի առանձին քաղաքների հետ. Սպիտակը` Խելվաչաուրիի, Ալավերդին` Քոբուլեթիի և Ախթալան` Չաքվիի հետ:
Այցը նախապատրաստվել էր Վրաստանում ՀՀ դեսպանության և Բաթումում ՀՀ գլխավոր հյուպատոսության համատեղ ջանքերով:

Սեպտեմբերի 9-ին պատվիրակությունը` Վրաստանում ՀՀ արտակարգ և լիազոր դեսպան Հովհաննես Մանուկյանի և Բաթումում ՀՀ գլխավոր հյուպատոս Արամ Գրիգորյանի ուղեկցությամբ սկսեց այցի պաշտոնական մասը և առաջին հանդիպումն ունեցավ Բաթումի քաղաքապետ Ջեմալ Անանիձեի հետ: Զրույցի ընթացքում կողմերը գոհունակություն հայտնելով համագործակցության ներկա մակարդակի առիթով` վերահաստատեցին Աջարիայի Ինքնավար Հանրապետության և Լոռու մարզի քույր քաղաքների, մասնավորապես Բաթումի և Վանաձորի միջև համագործակցության հետագա ընդլայնման հարցում իրենց շահագրգռվածությունը: Բաթումի քաղաքապետը հակիրճ ներկայացրեց Բաթումի զարգացման հեռանկարները, ընդգծեց բաթումահայերի ակտիվ դերը քաղաքի զարգացման գործում: Առիթն օգտագործելով` դեսպան Մանուկյանը բարձրացրեց բաթումահայության համար մշակութային կենտրոն կառուցելու անհրաժեշտության հարցը և այդ նպատակով հորդոր ուղղեց քաղաքային իշխանություններին` համապատասխան հողատարածք հատկացնելու համայնքին:

Այնուհետ Ինքնավար Հանրապետության կառավարությունում տեղի ունեցավ պատվիրակության հանդիպումը Աջարիայի կառավարության ղեկավար Արչիլ Խաբաձեի հետ: Կողմերը կարևորելով բարեկամ պետությունների տարածաշրջանների միջև համագործակցությունը` վստահություն հայտնեցին, որ այս հանդիպումը նոր մակարդակի կբարձրացնի հարաբերությունները, և կապերն այսուհետ կիրականացվեն ոչ միայն քաղաքների, այլև վարչատարածքային միավորների մակարդակով: Աջարիայի ղեկավարը մանրամասն ներկայացրեց Ինքնավար հանրապետության զարգացման հեռանկարներն ու ուղղությունները, հատկապես կանգ առնելով զբոսաշրջության ոլորտի վրա, որը կենսական նշանակություն ունի Աջարիայի համար: Նշվեց, որ Աջարիայի արևելքում նախատեսվում է լեռնադահուկային նոր կենտրոնի կառուցումը, ինչի արդյունավետ շահագործումն անհնարին է առանց որակյալ ճանապարհի, իսկ այդ ճանապարհը` Բավրա-Ախալցխա-Ադիգենի-Խուլո-Բաթում ճանապարհի ամենաանորակ հատվածն է: Արթուր Նալբանդյանն ընդգծեց, որ Հայաստանը շահագրգիռ է վերոհիշյալ ճանապարհի վերանորոգման հարցում, քանի որ այն զգալիորեն կրճատում է Երևան-Բաթում երթուղու տևողությունը: Վարչապետը տեղեկացրեց, որ արդեն իսկ նորոգվում է ճանապարհի Ադիգենի-Խուլո հատվածը:
Հաշվի առնելով, որ Աջարիան Հայաստանին ցիտրուսային կուլտուրաների հիմնական մատակարարն է, պրն. Խաբաձեն տեղեկացրեց, որ ընթացիկ տարում առատ բերք է սպասվում և պետք է ապահովել դրա որակյալ տեղափոխումը:
Հանդիպման ընթացքում քննարկվեց նաև Աջարիայի ծովափերին հանգստացողների անվտանգության և փրկարարական աշխատանքների արդյունավետության բարձրացման մասին հարցը: Վարչապետը հավաստիացրեց, որ խնդիրը գտնվում է կառավարության ուշադրության կենտրոնում և կոնկրետ միջոցառումներ են ձեռնարկվում` թե տեխնիկական վերազինման, թե փրկարարների թվակազմի ավելացման ուղղությամբ:

Բանակցությունների ավարտին պատվիրակությունների ղեկավարները ստորագրեցին “ՀՀ Լոռու մարզի և Վրաստանի Աջարիայի Ինքնավար Հանրապետության միջև համագործակցության մասին” Փոխըմբռնման հուշագիրը:
Օրվա երկրորդ կեսին Լոռու մարզի պատվիրակությունն այցելեց Բաթումի “Սուրբ Փրկիչ” հայկական եկեղեցի, ուր հանդիպեց աջարահայ համայնքի ներկայացուցիչների հետ: Դրան հաջորդեց մասնակցությունն Աջարահայ համայնքի «Աղբյուր» էլեկտրոնային կայքի շնորհանդեսին, որը տեղի ունեցավ Բաթումի “Բարեկամության տանը”: Կայքի շնորհանդեսից հետո ողջույնի և աջակցության իրենց խոսքը հնչեցրին Վրաստանում ՀՀ արտակարգ և լիազոր դեսպան Հովհաննես Մանուկյանը և Բաթումում ՀՀ գլխավոր հյուպատոս Արամ Գրիգորյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր