Վիկտոր Համբարձումյանի հիշատակին նվիրված հուշատախտակի բացման արարողություն Թբիլիսիում

12 հունիսի, 2014

Հունիսի 12-ին Վրաստանում ՀՀ դեսպանության նախաձեռնությամբ և Թբիլիսիի քաղաքապետարանի աջակցությամբ Թբիլիսի քաղաքի Լադո Ասաթիանի 42 հասցեում, տեղի ունեցավ հայազգի աշխարհահռչակ գիտնական, ակադեմիկոս և անվանի աստղագետ Վիկտոր Համբարձումյանի հիշատակին նվիրված հուշատախտակի բացման արարողությունը:

Հանդիսավոր արարողությանը ներկա էին Վրաստանում ՀՀ դեսպանության դիվանագիտական կազմը, Վիրահայոց թեմի առաջնորդ Վազգեն եպս. Միրզախանյանը, Վրաստանի խորհրդարանի հայազգի պատգամավոր Ռուսլան Պողոսյանը, Վրաստան թերթի գլխավոր խմբագիր Վան Բայբուրթյանը, թբիլիսաբնակ գրող-թարգմանիչ Գիվի Շահնազարին, վրաց մտավորականներ, հայ համայնքի մշակութային ու հասարակական գործիչներ:

Միջոցառմանը բարձր գնահատանքի խոսքով հանդես եկավ Թբիլիսիի քաղաքապետարանի ներկայացուցիչ, Մշակույթի և սոցիալական հարցերի քաղաքային ծառայության վարչության պետ Մամուկա Քացարավան, ով կարևորեց հուշատախտակի բացման փաստը Թբիլիսի քաղաքում՝ նշելով, որ հպարտ և ուրախ է, որ թբիլիսաբնակ հայազգի անվանի անձանց հիշատակին նվիրված հուշատախտակները տեղադրվում են Վրաստանի մայրաքաղաքում, միևնույն ժամանակ հայտնելով, որ այդ գործընթացը կրելու է շարունակական բնույթ:

Հուշատախտակի բացմանը ողջույնի խոսքով հանդես եկավ նաև Վրաստանում ՀՀ գործերի ժամանակավոր հավատարմատար Վահագն Աֆյանը, ով բարձր գնահատեց Թբիլիսիի քաղաքապետարանի պատասխանատու պաշտոնատար անձանց հետ Վրաստանում Հայաստանի Հանրապետության դեսպանության համագործակցության շնորհիվ իրականություն դարձած համաշխարհային աստղագիտության բնագավառում մեծ ներդրում ունեցող ակադեմիկոսի հիշատակը հավերժացնող հուշատախտակի բացումը Թբիլիսիում:

Վահագն Աֆյանը մասնավորապես` նշեց. Կրկնակի անգամ մեծ պատիվ է ինձ համար ներկա գտնվել այստեղ, քանի որ Հայաստանի բարեկամ և դրկից մյուս հարևան երկրում` Իրանի Իսլամական Հանրապետության մայրաքաղաք Թեհրանի արվարձանում, Փարդիս կոչվող տեխնոլոգիական պարկում գտնվող գիտնականների պուրակում տարիներ առաջ մասնակցել եմ հանրահայտ աստրոֆիզիկոս Վիկտոր Համբարձումյանի հիշատակը հավերժացնող պղնձաձույլ կիսանդրիի բացմանը»:

Շնորհակալական և դրվատանքի խոսքեր ուղղվեցին նաև թբիլիսաբնակ հայ մտավորականներին, հովանավորին և բոլոր այն անհատներին, ովքեր իրենց ներդրումն են ունեցել Վիկտոր Համբարձումյանի հուշատախտակի ստեղծման և տեղադրման գործում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր