Վրաստանում ՀՀ դեսպանի այցը Վրաստանի Սամցխե-Ջավախեթի մարզ

14 դեկտեմբերի, 2022

Վրաստանի Սամցխե-Ջավախեթիի մարզ կատարած այցի շրջանակներում դեկտեմբերի 13-ին Վրաստանում ՀՀ դեսպան Աշոտ Սմբատյանի գլխավորած պատվիրակությունը Ախալցխայում հանդիպում ունեցավ Սամցխե-Ջավախեթիում Վրաստանի կառավարության ներկայացուցիչ Բեսիկ Ամիրանաշվիլիի հետ: Հանդիպմանը մասնակցում էին նաև Ախալցխայի քաղաքապետ Իրակլի Լազարիշվիլին և սակրեբուլոյի նախագահ Դավիթ Լոմիձեն:

Հանդիպմանն անդրադարձ կատարվեց Հայաստանի և Վրաստանի միջև ապակենտրոնացված համագործակցության հնարավորություններին:

Այնուհետև ՀՀ դեսպանը և Ախալցխայի քաղաքապետը Ախալցխայի տիկնիկային թատրոնի սրահում հանդիպում ունեցան տեղի հայության ներկայացուցիչների հետ: Քաղաքապետի և սակրեբուլոյի նախագահի, ինչպես նաև վերջիններիս տեղակալների ուղեկցությամբ ՀՀ դեսպանն այցելեց Ախալցխայի «Արմաթ» կենտրոն, Սուրբ Գրիգոր Լուսավորիչ եկեղեցի և եկեղեցուն կից գործող «Վարդգես Սուրենյանց» կրթամշակութային և երիտասարդական կենտրոն:

Ախալցխայի մունիցիպալիտետ ՀՀ դեսպանի այցն ավարտվեց Ծուղրութ գյուղում՝ Սապոնջjանների տանը, որտեղ Ախալցխայի հայության հոգևոր հովիվ Հայր Հակոբը ներկայացրեց այդ տանը պահվող 10-րդ դարի հայտնի Ավետարանը:

Դեկտեմբերի 13-14-ը Վրաստանում ՀՀ դեսպան Աշոտ Սմբատյանի գլխավորած պատվիրակությունը եղավ Ախալքալաքի մունիցիպալիտետում:

Դեկտեմբերի 13-ին պատվիրակությունը այցելեց Ախալքալաքի Սուրբ Խաչ եկեղեցի, ինչպես նաև Ախալքալաքի համար 4 հանրային դպրոց, որտեղ հանդիպում ունեցավ դպրոցի ուսուցիչների և աշակերտների հետ: Նույն օրը ՀՀ դեսպանին Ախալքալաքի քաղաքապետարանում ընդունեցին քաղաքապետ Մելքոն Մակարյանը և սակրեբուլոյի նախագահ Նաիրի Իրիցյանը՝ քաղաքապետարանի աշխատակիցների հետ միասին:

Ախալքալաքում ՀՀ դեսպանը հյուրընկալվեց ընդհանուր առաջնորդական փոխանորդ Հոգեշնորհ Տեր Նշան վարդապետ Հմայակյանի կողմից, որից հետո վերջինիս ուղեկցությամբ այցելեց Ախալքալաքի և Կումուրդոյի միտրոպոլիտ Նիկոլոզ Փաչուաշվիլիի նստավայր:

Դեկտեմբերի 14-ին ՀՀ դեսպանն այցելեց Կարծախ գյուղում գտնվող Ջիվանու տուն-թանգարան: Դեսպանության պատվիրակությունը Ախալքալաքի «Ապագայի տուն» կենտրոնում ներկա գտնվեց «Ֆրունզիկ Մկրտչյան. Հնդկաստանը հիշում է ինձ» ֆիլմի ցուցադրությանը, որին հաջորդեց հանդիպում Ախալքալաքի հայության հետ: ՀՀ դեսպանն այցելեց նաև Ախալքալաքի երիտասարդական կրթամշակութային կենտրոն, ծանոթացավ կենտրոնում գործող Թումոյի խմբակի գործունեությանը։

Դեկտեմբերի 14-ին Վրաստանում ՀՀ դեսպան Աշոտ Սմբատյանը եղավ Նինոծմինդայի մունիցիպալիտետում:

Դեսպանության պատվիրակությունը այցելեց մունիցիպալիտետի Գանձա գյուղում գտնվող Վահան Տերյանի տուն-թանգարան, ծանոթացավ թանգարանի ցուցադրությանը։

Քաղաք Նինոծմինդայում պատվիրակությունը հանդիպում ունեցավ քաղաքապետ Անիվարդ Մոսոյանի, սակրեբուլոյի նախագահ Վահան Արոյանի և քաղաքապետարանի ղեկավար կազմի հետ, որին հաջորդեց հանդիպում տեղի հայության հետ:

Նինոծմինդայի Սուրբ Սարգիս եկեղեցում ՀՀ դեսպանին դիմավորեց Նինոծմինդայի շրջանի հայության հոգևոր հովիվ Տեր Արմաշ քահանա Պողոսյանը և ուղեկցեց եկեղեցուն կից գործող «Ռաֆայել Ջավախ» կրթամշակութային երիտասարդական կենտրոն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր