Թբիլիսիի Գյոթեի ինստիտուտում բացվեց Գևորգ Բաշինջաղյանի հուշատախտակը

11 նոյեմբերի, 2026

Նոյեմբերի 11-ին Վրաստանում Հայաստանի Հանրապետության դեսպանության նախաձեռնությամբ և Թբիլիսիի Գյոթեի ինստիտուտի աջակցությամբ՝ ինստիտուտի շենքում տեղի ունեցավ հայ մեծանուն նկարիչ Գևորգ Բաշինջաղյանի հիշատակը հավերժացնող եռալեզու հուշատախտակի բացման հանդիսավոր արարողությունը։ Հուշատախտակը բացեցին Վրաստանում ՀՀ դեսպան Աշոտ Սմբատյանը և Գյոթեի ինստիտուտի տնօրեն Լաուրա Հարցը։

Միջոցառմանը ներկա էին Վրաստանում Գերմանիայի դեսպան Բարբարա Ֆոսը, դիվանագետներ, Վրաստանի ԱԳՆ Եվրոպայի վարչության տնօրեն Գիորգի Դոլիձեն, մշակույթի գործիչներ և հայ համայնքի ներկայացուցիչներ։

Իր խոսքում ՀՀ դեսպանն ընդգծեց Բաշինջաղյանի կյանքի և ստեղծագործական ուղու անքակտելի կապը Վրաստանի, մասնավորապես՝ Թբիլիսիի հետ, որտեղ նկարիչն ապրել և ստեղծագործել է իր կյանքի նշանակալի հատվածում։ Նա կարևորեց արվեստագետի ներդրումը հայ ազգային կերպարվեստի զարգացման և Թբիլիսիի մշակութային կյանքի հարստացման գործում՝ ընդգծելով նրա ժառանգության միավորող նշանակությունը հայկական, վրացական և եվրոպական մշակույթների համատեքստում։

Դեսպանը շնորհակալություն հայտնեց Գյոթեի ինստիտուտի տնօրենին և Հայաստանի ազգային պատկերասրահի աշխատակցուհի Հայկուհի Սահակյանին՝ նախաձեռնության աջակցելու համար, ինչպես նաև առանձնահատուկ երախտագիտություն հայտնեց բարերար Վլադիմիր Չիրախովին, ով Գևորգ Բաշինջաղյանի՝ 1918 թվականին ստեղծած մեկ կտավ ի պահ հանձնեց Գյոթեի ինստիտուտին։

Միջոցառման երաժշտական ծրագրի շրջանակում վիրահայ երիտասարդ դաշնակահար Արսեն Կարապետյանի կատարմամբ հնչեցին Բաբաջանյանի և Շոպենի ստեղծագործություններից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր