Ստեղծագործական երեկո` նվիրված հայտնի բանաստեղծ և թարգմանիչ Գիվի Շահնազարիին

10 մայիսի, 2012

Մայիսի 10-ին Վրաստանում գործող «Կովկասյան տուն» մշակութային հարաբերությունների կենտրոնում տեղի ունեցավ Վրաստանում հայտնի բանաստեղծ և թարգմանիչ, Գալակտիոն Տաբիձեի անվան գրական մրցանակի դափնեկիր, Մեսրոպ Մաշտոցի մեդալակիր Գիվի Շահնազարիին նվիրված ստեղծագործական երեկոն:

Միջոցառմանը ներկա էին Վրաստանում ՀՀ արտակարգ և լիազոր դեսպան Հովհաննես Մանուկյանը, Հայ Առաքելական Ուղղափառ Սուրբ եկեղեցու Վիրահայոց թեմի առաջնորդ Տ. Վազգեն եպս. Միրզախանյանը, դեսպանության աշխատակիցներ, հոգևոր դասի, վիրահայ մտավորականության և Վրաստանի ազգային փոքրամասնությունների առանձին համայնքների ներկայացուցիչներ:

Երեկոյի մշակութային ծրագրում ընդգրկված էին տարբեր երաժշտական և գրական ելույթներ, այդ թվում հայ մեծ բանաստեղծներ Նահապետ Քուչակի և Պարույր Սևակի բանաստեղծությունները, որոնց պոեզիայի վրացերեն թարգմանության չգերազանցված վարպետն է Գիվի Շահնազարին, ցուցադրվեցին դրվագներ նրա մասին պատմող վավերագրական ֆիլմից:

Գիվի Շահնազարի գործունեության մասին խոսեցին «Կովկասյան տան» տնօրեն, հայտնի վրաց բանաստեղծուհի Նաիրա Գելաշվիլին և Հայաստանի դեսպան Հովհաննես Մանուկյանը, ով, մասնավորապես, կարևորեց Գիվի Շահնազարիի նման մտավորականների անփոխարինելի դերը հայ-վրացական բարեկամության խորացման գործում: Ի նշան Գիվի Շահնազարիի երկարամյա և արդյունավետ գիտամանկավարժական գործունեության, ստեղծագործող սերնդի դաստիարակության, թարգմանության արվեստի ասպարեզում արժեքավոր գործեր ստեղծելու և ցուցաբերած վարպետության, ինչպես նաև գրականության բնագավառում ունեցած նշանակալից ավանդի և մեծ վաստակի ճանաչման, դեսպան Հ.Մանուկյանը նրան հանձնեց Վրաստանում Հայաստանի Հանրապետության դեսպանության պատվոգիրը:

Երեկոյի ընթացքում ՀՀ դեսպանը հարցազրույցներ տվեց մի շարք վրացական հեռուստաընկերություններին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր