ՀՀ Անկախության 21-րդ տարեդարձին նվիրված ընդունելություն Վրաստանում

21 սեպտեմբերի, 2012

Սեպտեմբերի 21-ին Վրաստանի մայրաքաղաքում, Թբիլիսիի «Krtsanisi Residence» համալիրում տեղի ուենցավ ՀՀ Անկախության 21-րդ տարեդարձին նվիրված Վրաստանում ՀՀ դեսպանության կազմակերպած պաշտոնական ընդունելությունը:

Հանդիսությանը մասնակցում էին Վրաստանի պետական, քաղաքական և հասարակական ու գործարար շրջանակների բազմաթիվ ներկայացուցիչներ, Թբիլիսիում հավատարմագրված դիվանագիտական և միջազգային կազմակերպությունների առաքելությունների ղեկավարներ, ռազմական կցորդներ, բարձրաստիճան հոգևորականներ, ինչպես նաև վրացահայ համայնքի հասարակական և մշակութային կառույցների տասնյակ ներկայացուցիչներ:

Ներկաներին ուղղված իր խոսքում Վրաստանում ՀՀ արտակարգ և լիազոր դեսպան Հովհաննես Մանուկյանն անդրադառնալով անկախությունից ի վեր Հայաստանի ունեցած ձեռքբերումներին և խաղաղ համակեցության ու կայուն զարգացման նպատակների իրագործմանն ուղղված մարտահրավերներին, մասնավորապես նշել է. «Այսուհետ ևս Հայաստանի արձագանքը միանշանակ և վճռական է լինելու տարածաշրջանային անկայունությանն ուղղված ցանկացած տեսակի սադրանքներին: Մենք ցանկանում ենք հստակեցնել, որ հայկական պետականությունն ու արտերկրի հայ համայնքներն ունեն նշանակալից և ծանրակշիռ դերակատարություն, որոնց հետ հնարավոր չէ հաշվի չնստել նաև հետագայում»: Դեսպանը միևնույն ժամանակ անդրադարձել է Վրաստանի հետ տարբեր ոլորտներում փոխգործակցության խորացման հեռանկարներին, ինչպես նաև բարձր է գնահատել վրացահայ համայնքի դերը երկու երկրների միջև հարաբերությունների զարգացման գործում:

Վրացական կողմից շնորհավորական խոսքով հանդես է եկել Վրաստանի ԱԳ նախարարի առաջին տեղակալ Նիկոլոզ Վաշակիձեն:

ՀՀ Անկախության 21-րդ տարեդարձին նվիրված պաշտոնական ընդունելության ընթացքում տոնական երգերով հանդես են եկել Թբիլիսիի «Հայարտուն» մշակութային կենտրոնի սաները, ցուցադրվել են Հայաստանի վերաբերյալ տեսահոլովակներ: Հյուրասիրությունն ուղեկցվել է հայկական խոհանոցային ավանդական ուտեստների և հայկական «Գրանդ Քենդի» ընկերության արտադրատեսականու խորհրդանշական նվերների մատուցմամբ:

www.mfa.am/hy/press-releases/item/2012/09/21/21th_geo/

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր