Հայաստանի Անկախության 22-րդ տարելիցին նվիրված պաշտոնական ընդունելություն Վրաստանում

22 սեպտեմբերի, 2013

Սեպտեմբերի 20-ին, Թբիլիսիում Վրաստանում ՀՀ արտակարգ և լիազոր դեսպանի նստավայրում տեղի ունեցավ ՀՀ ազգային տոնին` Անկախության 22-րդ տարելիցին նվիրված պաշտոնական ընդունելություն:

Ընդունելությանը ներկա էին Վրաստանի կառավարության անդամներ, իշխանության այլ կառույցների պաշտոնյաներ, քաղաքական, հասարակական և գործարար շրջանակների բազմաթիվ ներկայացուցիչներ, Թբիլիսիում հավատարմագրված դիվանագիտական առաքելությունների և միջազգային կազմակերպությունների ղեկավարներ, ռազմական կցորդներ, բարձրաստիճան հոգևորականներ, ինչպես նաև Վրաստանի հայ համայնքի հոգևոր, գործարար, հասարակական և մշակութային շրջանակների ներկայացուցիչներ:

Ներկաներին ուղղված ողջույնի խոսքում Վրաստանում ՀՀ արտակարգ և լիազոր դեսպան Հովհաննես Մանուկյանը` անդրադառնալով 1991 թվականին հռչակված հայկական պետության անկախությանը՝ որպես վերջին մի քանի դարերի ընթացքում հայ ժողովրդի ամենանշանակալից ձեռքբերում, նշեց. «Վերջին երկու տասնամյակների ընթացքում մեր ժողովրդին շատ ցավ և տառապանք է բաժին հասել. ավերիչ երկրաշարժ, ղարաբաղյան հակամարտություն, տնտեսական և տրանսպորտային շրջափակում: Այնուամենայնիվ, չնայած հսկայական բարդություններին, չնայած մեր երկրի շատ համեստ ռեսուրսներին, ժողովուրդը կարողացավ հաջողությամբ դիմակայել այս բոլոր մարտահրավերներին և հաղթանակած դուրս գալ: Եվ այստեղ փոքր չէ նաև մեր` հայկական դիվանագիտության վաստակը»:

Դեսպան Մանուկյանն իր խոսքում արձանագրեց հայ-վրացական հարաբերությունների բարձր մակարդակը և կարևորեց դրանք ամրապնդելուն և խորացնելուն ուղղված երկուստեք ջանքերը` որպես արտաքին քաղաքական առաջնահերթություն: «Հայաստանը հետաքրքրված է կայուն և հզոր Վրաստանով, ինչպես նաև Վրաստանի շահերից է բխում տեսնել Հայաստանը` որպես ծաղկող պետություն: Վրաստանի և Հայաստանի փոխգործակցության ռազմավարական բնույթը օրգանապես համապատասխանում է մեր երկրների, ազգային և տնտեսական անվտանգության պահանջներով թելադրված արտաքին քաղաքականության առաջնահերթություններին» - նշեց Հովհաննես Մանուկյանը:

Վրացական կողմից շնորհավորական խոսքով հանդես եկավ Վրաստանի արտաքին գործերի նախարար Մայա Փանջիկիձեն:

ՀՀ Անկախության 22-րդ տարելիցին նվիրված պաշտոնական ընդունելության ընթացքում մշակութային ծրագրով հանդես եկան «Հայարտուն» մշակութային կենտրոնին կից գործող պարային և երաժշտական խմբերը, անհատ կատարողներ: Երեկոյի ընթացքում հյուրերը կարող էին դիտել թբիլիսահայ լուսանկարիչներ Յուրի Մեչիտովի և Յուրի Ակուլյանի` Հայաստանի գեղատեսիլ վայրերն ու կենցաղը պատկերող լուսանկարները:

Հյուրընկալության ընթացքում ներկաներին մատուցվեցին հայկական խոհանոցին հատուկ ավանդական ուտեստներ և հայկական ընկերությունների բարձրակարգ ըմպելիքներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր