Դեսպան Մանուկյանի հանդիպումը Վրաստանի կրթության և գիտության նախարար Թամարա Սանիկիձեի հետ

24 հոկտեմբերի, 2013

Հոկտեմբերի 23-ին Վրաստանում ՀՀ արտակարգ և լիազոր դեսպան Հովհաննես Մանուկյանն աշխատանքային հանդիպում ունեցավ Վրաստանի կրթության և գիտության նախարար Թամարա Սանիկիձեի հետ:

Հանդիպման նպատակը ծանոթությունն էր նորանշանակ նախարարին, Վրաստանի կրթական քաղաքականությանը ոչ վրացական դպրոցների և ծրագրերի նկատմամբ, ինչպես նաև Հայաստանի Հանրապետության և Վրաստանի կրթության և գիտության նախարարությունների միջև համագործակցության և երկկողմ հարաբերությունների երկուստեք հետաքրքրություն ներկայացնող առանձին հարցերի քննարկումը:

ՀՀ դեսպանը շնորհակալություն հայտնելով ընդունելության համար՝ նշեց, որ հայ-վրացական համագործակցությունը կրթության ոլորտում երկկողմ հարաբերությունների կարևոր ուղղություններից է և երկու գերատեսչությունների միջև առկա է համագործակցության բարձր մակարդակ:

Հանդիպման ընթացքում ՀՀ դեսպանը նախարարին ուղղեց ոչ վրացալեզու դպրոցների նկատմամբ նախարարության կողմից իրականացվող քաղաքականության և Վրաստանում գործող հայալեզու դպրոցների վերաբերյալ մի շարք հարցեր: Մասնավորապես դեսպան Մանուկյանն անդրադարձավ ոչ վրացական դպրոցներին տրամադրվող դասագրքերի որակի և հայալեզու նյութերում հանդիպող մեծ քանակությամբ սխալների վերացման անհրաժեշտությանը, հայոց լեզվի առարկայական օլիմպիադաների վերականգնման խնդրին, դպրոցներում ավարտական քննությունների շարքում հայոց լեզվի՝ որպես քննական առարկայի ընդգրկման հարցին և մի շարք այլ արդիական խնդիրների:

Դեսպանը և նախարարը քննարկեցին Վրաստանում գործող հայկական դպրոցների ենթակառուցվածքներին առնչվող հարցեր և այն ուսումնական հաստատությունների անհապաղ վերականգնման խնդիրները, որոնք գտնվում են անմխիթար վիճակում:

Հովհաննես Մանուկյանը նախարարի հետ զրույցի ընթացքում կարևորեց նաև Վրաստանի բուհական համակարգում հայալեզու դպրոցների համար կադրերի պատրաստման և որակավորման հարցը, նա անդրադարձավ նաև դպրոցներում հայոց պատմության դասավանդման հնարավորության խնդրին:

Թամարա Սանիկիձեն, համաձայնվելով արծարծված բոլոր հարցերի և խնդիրների կարևորության և արդիականության հետ, նշումներ կատարեց հայկական դպրոցներին վերաբերվող խնդիրների օրակարգում և հավաստեց, որ մոտ ժամանակներում կողմերը համապատասխան քննարկումներ կունենան այդ թեմաներով:

Հանդիպման վերջում ՀՀ դեսպան Մանուկյանը առաջարկեց առավել ակտիվացնել երկու գերատեսչությունների ղեկավարների հանդիպումների և շփումների հաճախակիությունը, որին ի պատասխան նախարարն իր պատրաստակամությունը հայտնեց Վրաստանում կայանալիք նախագահական ընտրություններից հետո իր հայ գործընկերոջը հրավիրել Վրաստան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր