Բուն Բարեկենդանի տոնի և Դիվանագետի օրվան նվիրված միջոցառումներ Թբիլիսիում

02 մարտի, 2014

Մարտի 2-ին, Թբիլիսիի Սուրբ Էջմիածին եկեղեցում Բուն Բարեկենդանի տոնի առթիվ մատուցվեց Սուրբ Պատարագ, որի պատարագիչն էր Տեր Մանուկ քահանա Զեյնալյանը: Արդեն 2-րդ տարին է, ինչ Վրաստանի հայ համայնքը Բուն Բարեկենդանի օրը նշում է «Հարիսա»-ի փառատոնին զուգահեռ, որն այս տարի կազմակերպվել էր Հայ Առաքելական Եկեղեցու Վիրահայոց Թեմի աջակցությամբ, հայ կանանց «Շուշանիկ» միության և «Հայարտուն» կենտրոնի կողմից: «Հարիսա»-ի փառատոնին նվիրված միջոցառումն անցկացվեց Վիրահայոց Թեմի «Հայարտուն» կենտրոնում, որին մասնակցում էին Վրաստանում Հայաստանի դեսպանությունը՝ ՀՀ արտակարգ և լիազոր դեսպան Հովհաննես Մանուկյանի գլխավորությամբ, ՀԱԵ Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը, ազգային փոքրամասնությունների հարցերով Վրաստանի նախագահի խորհրդական Սոֆիկո Շամանիդին, հայ համայնքի մեծաթիվ ներկայացուցիչներ:

Միջոցառմանը ողջույնի խոսքով հանդես եկավ ՀՀ արտակարգ և լիազոր դեսպան Հովհաննես Մանուկյանը: Դեսպան Մանուկյանը, շնորհավորելով ներկաներին Բուն Բարեկենդանի օրվա առթիվ՝ նշեց, որ Հայաստանի պետական տոնացույցում մարտի 2-ը նշվում է որպես դիվանագետի օր: Շնորհավորելով միջոցառման մասնակիցներին և Վրաստանում հավատարմագրված հայ դիվանագետներին մասնագիտական տոնի կապակցությամբ՝ դեսպանը կոչ արեց Հայաստանի և համայնքային բոլոր կառույցների միախմբման` ազգային առաջնահերթությունների ուղղությամբ առավել արդյունավետ ընթացք ապահովելու նպատակով:

Հովհաննես Մանուկյանը համայնքային կյանքի առանձին բնագավառներում ցուցաբերած ակտիվության և ունեցած վաստակի համար համայնքային մի շարք գործիչների հանձնեց Հայաստանի Սփյուռքի, Կրթության և Գիտության, Մշակույթի, Սպորտի և Երիտասարդության Հարցերի Նախարարությունների գերատեսչական պարգևներ:

Միջոցառման ավարտին օրհնության և գնահատանքի խոսքով հանդես եկավ ՀԱԵ Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր