Դեսպան Մանուկյանը մասնակցեց Նինոծմինդայում Հայոց Մեծ Եղեռնի զոհերի հիշատակին նվիրված հուշակոթողի բացման արարողությանը

23 ապրիլի, 2014

Ապրիլի 23-ին Սամցխե-Ջավախքի տարածաշրջանի Նինոծմինդա քաղաքի Սուրբ Սարգիս եկեղեցում Հայոց Մեծ Եղեռնի զոհերի հիշատակին նվիրված հոգեհանգստի պատարագ մատուցվեց: Այնուհետև Նինոծմինդայի շրջանային մշակույթի տան բակում տեղի ունեցավ Հայոց Մեծ Եղեռնի զոհերի հիշատակին նվիրված հուշակոթողի օծման հանդիսավոր արարողությունը: Օծման արարողությունը նախագահում էր Հայ Առաքելական Եկեղեցու Վիրահայոց Թեմի Առաջնորդ Տեր Վազգեն եպիսկոպոս Միրզախանյանը՝ Սամցխե-Ջավախքի և Ծալկայի ընդհանուր Առաջնորդական փոխանորդության փոխառաջնորդ Տեր Բաբգէն վարդապետ Սալբիյանի և թեմի հոգևոր դասի մասնակցությամբ:

Հուշակոթողի օծման արարողակարգից հետո Վրաստանում ՀՀ արտակարգ և լիազոր դեսպան Հովհաննես Մանուկյանը՝ ծագումով ջավախքցի գործարար, բարերար Արմեն Ղարսլյանի հետ միասին հանդիսավորությամբ բացեցին հուշակոթողը:

Այնուհետև դեսպան Մանուկյանը հրապարակում հավաքված հոծ բազմությանը դիմեց խոսքով: Նա մասնավորապես նշեց. «Հայոց ցեղասպանության զոհերի հիշատակին նվիրված հուշակոթողի տեղադրումը Նինոծմինդայում հիրավի պատմական իրադարձություն է: Սա ևս մեկ քայլ է մեր բարեկամ երկրի հասարակության կողմից Հայոց Մեծ Եղեռնի ճանաչման և դատապարտման պատմական անհրաժեշտության ընկալման ուղղությամբ»: Հովհաննես Մանուկյանն արձանագրեց նաև, որ վերջերս Սիրիայի Քեսաբ քաղաքում տեղի ունեցած ահաբեկչական գործողությունները և դրա հետևանք դարձած ողբերգական իրադարձությունները ևս լրացուցիչ վկայություն են, որ Հայոց ցեղասպանության ճանաչումը և դատապարտումը հրատապ նշանակություն ունեցող հրամայական պահանջ է: «Արդարության վերականգնումը բարոյական չափանիշների վրա հիմնված գաղափար է։ Արդար իրավունքն ու քաղաքական նպատակահարմարությունը ոչ թե պետք է հակասեն միմյանց, այլ համալրեն, որովհետև արդար իրավունքի սկզբունքը բնորոշ է զարգացած և քաղաքակիրթ պետություններին: Այսօրինակ գաղափարախոսությամբ զինված մենք աշխարհի բոլոր պետություններին վճռականորեն կոչ ենք անում միացնել իրենց ձայնը Հայոց ցեղասպանության ճանաչման և դատապարտման պահանջին և դատապարտել Թուրքիայի՝ Հայոց ցեղասպանության փաստի ժխտողական քաղաքականությունը, քանի որ այն ուղղված է միջազգային իրավունքի և արդարության հաղթանակի դեմ», - ընդգծեց ՀՀ դեսպանը։

Խոսքով հանդես եկան նաև ՀԱԵ Վիրահայոց Թեմի Առաջնորդ Տեր Վազգեն եպիսկոպոս Միրզախանյանը, Վրաց ուղղափառ եկեղեցու Ախալքալաքի Կումուրդոյի թեմի առաջնորդ, արքեպիսկոպոս Նիկոլոզը, Վրաստանի խորհրդարանի պատգամավորներ, տեղական իշխանության ներկայացուցիչներ, հասարակական և մշակութային բազմաթիվ գործիչներ:

Արարողությանը մասնակցում էին հայ և վրաց եկեղեցիների բարձրաստիճան հոգևորականներ, տեղական իշխանությունների ներկայացուցիչներ, Վրաստանի Խորհրդարանի և ՀՀ Ազգային Ժողովի պատգամավորներ, գործարարներ, Հայաստանից ժամանած հյուրեր, Թբիլիսիից ժամանած պատվիրակություն և ջավախահայության մեծաթիվ ներկայացուցիչներ:

Վրաստանում ՀՀ դեսպանություն

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր