Հայոց Ցեղասպանության զոհերի հիշատակին նվիրված թատերական բեմադրություն Թբիլիսիում

30 ապրիլի, 2014

Ապրիլի 29-ին Թբիլիսիի Պետրոս Ադամյանի անվան հայկական պետական դրամատիկական թատրոնը Հայոց Ցեղասպանության զոհերի հիշատակին նվիրված ներկայացում բեմադրեց` Ողբամ մեռելոց… Բեկամ շանթեր…Կոչեմ ապրողաց… խորագրով։ Ներկայացման բեմադրող ռեժիսորն էր թատրոնի գեղարվեստական ղեկավար Արմեն Բայանդուրյանը։ Ներկայացումը տեղի ունեցավ Թբիլիսիի Գրիբոեդովի անվան ռուսական դրամատիկական թատրոնի դահլիճում։

Բեմադրությունից առաջ Վրաստանում ՀՀ արտակարգ և լիազոր դեսպան Հովհաննես Մանուկյանի անունից հանդես եկավ Վրաստանում ՀՀ դեսպանության խորհրդական Լևոն Թորգոմյանը։ Նա մեջբերում կատարեց դեսպան Մանուկյանի խոսքից. «Հայոց բազմադարյան պատմության այս ամենաողբերգական էջերից մեկը գրվել է 99 տարի առաջ և, ցավոք սրտի, ողջ մարդկության դեմ կատարված այդ հանցագործությունն այսօր էլ հարկինս դատապարտված և պատժված չէ: Մինչ Մեծ Եղեռնի հարյուրամյակը մնացել է ընդամենը մեկ տարի: Քաղաքակիրթ մարդկությանը շատ ժամանակ տրված չէ հայ ժողովրդի նկատմամբ իր բարոյական պարտքը կատարելու համար: Ամեն տարի այս օրերին Թբիլիսիում և Վրաստանի մյուս շրջաններում կազմակերպվում են Հայոց Ցեղասպանության զոհերի հիշատակին նվիրված բազմաթիվ միջոցառումներ: Այսօր Պետրոս Ադամյանի անվան հայկական պետական դրամատիկական թատրոնի բեմադրությունը նույնպես մշակությային միջոցառում է` ի հիշատակ Մեծ Եղեռնի զոհերին»։

Հայոց Ցեղասպանության 99-րդ տարելիցին նվիրված բեմադրությունը հայ և վրաց հանդիսատեսին ներկայացրեց 1915 թվականի ողբերգական իրադարձությունները։

Բեմադրության երեկոյին մասնակացում էին ՀԱԵ Վիրահայոց Թեմի Առաջնորդ Տեր Վազգեն եպիսկոպոս Միրզախանյանը, Վրաստանում ՀՀ դեսպանության դիվանագիտական կազմը, «Վրաստան» թերթի գլխավոր խմբագիր Վան Բայբուրթը, հայ և վրաց մշակութային և հասարակական գործիչներ, Վրաստանի հայ համայնքի մեծաթիվ ներկայացուցիչներ։

Վրաստանում ՀՀ դեսպանություն

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր